حصل ماحصل والعبد يصبر على المقسوم

عليك الفرج يالله ياحي ياقيوم *** اله عبادة كلها تلتفت يمه

الا يارفيقي والله انه عداك اللوم *** انا اللي علي اللوم في ذمتي ذمه

ولكن سامحني ترا العلم فيه علوم *** ولايفرح اللي بينا ينقل النمه

حصل ماحصل والعبد يصبر على المقسوم *** يدور الزمن ويخلف الهزم والهمه

طراة الرجل لالحقه من الزمان هموم *** مايدري بسدة كود خيرة بني عمه

وسيع البنايد في الشدايد قوي عزوم *** لاعضك زمانك شال همك مع همه

وانا الله اني ماتهنى بحلو النوم *** ورفيقي عليه هموم الايام ملتمة

اشيل الحمل منه واحطه علي واقوم *** مقام يورد ضامي الما على الجمه

لكن الزمان الشين ظالم وانا المظلوم *** على الهون ياللي تمدح الوقت وتذمه

تهب الهبايب والسفن في البحور تعوم *** ويقفي بها صلف الهبايب عن اليمه

هبوب تصلفقها وبحر وسما ونجوم *** وموج تقفاه العواصيف وتزمه